Kafe Antzokia

Irail bukaeran berriro ohiko martxa hartuko dugu kontzertuekin. Hasteko, Fermin Muguruzak Zuloak taldearen diskoa eta urriaren 5ean aurkeztuko den filma aurkeztuko du prentsaren aurrean hilaren 13an.

Ondoren, The Zeros punk-rock talde mitikoa izango dugu irailaren 20an, Los Tupper taldeak lagunduta. 1976an Kaliforniako Chula Vistan osatutako taldeko kideak izango ditugu: Javier Escovedo, Hector Penalosa, Baba Chenelle eta Robert "El Vez" Lopez.

Hurrengo egunean, irailaren 21ean, Getxoko Smile taldeak Seasides diskoa aurkeztuko du, apirila eta maiatza artean Donibane Lohitzuneko Drop In / Quicksilver estudioan grabatua.

Biharamunean, irailaren 22an, The Cynics taldea etorriko zaigu. Garage doinuak jorratzen aintzindariak, talde estatubatuarra Spinning Wheel Motel diskoa aurkezten izango dugu. Rock'n'roll, garage eta doinu psikodelikoak jorratzen maisu den taldea.

Frankismoak hildako azken fusilatuak oroitu ohi diren irailaren 27an oroimen historikorako unerik izango da Ahaztuak 1936-1977 taldearen eskutik, Salvador Amor izango baitugu oholtza gainean, Gabriel Ortegarekin batera atera duen Somos pueblo disko berriko doinuak aurkezten.

Bukatzeko, irailaren 30ean Nashville Pussy eta Bob Wayne & The Outlaw Carnies zango ditugu. Lehenengo taldeak Rock'n'roll doinu biziak eta zuzeneko ikuskizun paregabea dakar, bigarrenak Wayneren kantagintza punk-countrya.

Aurten estreinakoz abuztu osoan zabalik izango dugu Kafe Antzokia egunez, astelehenetik ostiralera, 10:00etatik 19:00etara, eta menuak zerbitzatuko dira egun horietan eguerdiz. Larunbat gauetan ere zabalduko dugu. Aste Nagusian ere zabalik aurkituko gaituzu, eta kontzertu egitarauarekin. Hileko azken astean, berriz, itxi egingo dugu atseden hartzeko. Hona hemen Aste Nagusian izango ditugunak.

Abuztuaren 18an El Acto Ana Curra madrildar artistak El Acto ikuskizuna ekarriko digu.
Abuztuaren 23an Bigott + Hola A Todo El Mundo.
Abuztuaren 24an El Columpio Asesino + Belako
Abuztuaren 25an Travellin' Brothers Big Band+ Mambo Jambo

Bestalde, Aste Nagusian Algara konpartsa euskaldunak bere egitaraua izango du, aurrerago zehaztuko duguna: ikasleen eguna, iparralde eguna, bertso eguna. Ekitaldietan Urbeltzen Dantza Ganbara, Priscilla Band, DJ Bull, Txan Magoa, Akatz Reggae Banda, Anje Duhalde taldearekin... Euskaraz harremanak eginez ondo pasatzeko aukerarik ez da faltako aurten.

Ekaina ekitaldiz beterik datorkigu eta, horietan antzerkia nabarmenduko da, dudarik gabe, zenbait hitzordutan. Hasteko, Bilbon maiatz bukaeran eta ekain hasieran gurean izango dugu ACT jaialdia. Nazioarteko sortzaile berrien antzerkialdiak hainbat lan ekarriko dizkigu. Ostiralean James Finnemore, Dancing Brick, Sonya Levin eta Laboratorio de Acción Escénica izango ditugu euren lanak taularatzen, eta ondoren DJ The Sbitz-en txanda izango da diskoak jartzen. Larunbatean, jaialdia bukatuko da Alma Söderberg-en eta Birminghameko Kindle Theatreren emanaldiekin. Ondoren DJ Maria-k girotuko du osteko jaia.

Antzerkiak jarraituko du ekainaren 4an eta 5ean, IV. Gazte Antzerki Topaketak izango baititugu Kurkuluxetan antzerki eskolak antolatuta. Hilaren 13an Lingua Nabajorum antzezlanaren estreinaldia ikusi ahal izango dugu, bezperan prentsaren aurrean aurkeztu ostean estreinakoz antzeztuko baitute lan berria Mikel Martinez eta Patxo Telleria aktore bikoteak. Berriz ere, euskaldunon eta euskararen asturua umorez aztertuko dute, aurretik Euskara Sencilloaren Manifiestoa, Larru Haizetara eta Euskarazetamol lanekin egin bezala.

Muzzik eskolak ere antzerkia ekarriko digu ekainaren 17an eta 24an, bere antzerki eskolako ikasleek kurtsoa bukatzeko antzezpenak agertuko baitituzte jendaurrean.

Bestalde, hitzaldi eta aurkezpen franko izango ditugu ekainean. Hasteko, ekainaren 5ean Asisko Urmenetak Gartxot, Nafarroaren deskonkista kolektiboa gaia jorratuko du hitzaldian, Nafarroaren konkistaren 500. urteurrena dela eta. Gainera, berak eta Juanjo Elordik zuzenduriko Gartxot filma ikusi ahal izango da egunotan Bilboko Multis zine aretoetan. Asteazkenean, berriz, Jose Angel Irigaray idazlea jaiaren inguruan mintzatuko zaigu Algara konpartsak ekainaren 6an antolatu duen hitzorduan eta, egun berean, Zine dokumentala ere ikusi ahal izango dugu, Jon Maia zuzendariaren eskutik Gazta zati bat filma ikuskatu eta komentatu ahal izango baitugu berarekin. Julen Arexolaleibak euskalgintzaren inguruko bere hausnarketak ekarriko dizkigu hilaren 13an, Zenbat Gara elkarteak prestatutako hitzaldian. Joseba Agirreazkuenaga EHUko irakasleak "Bilbo gerra garaian" gaia jorratuko du, hiria frankisten eskuetan jausi zeneko 75. urteurrena beteko den egunean bertan, Bilbo Hiria irratiak antolatutako hitzaldian.

Jaiei dagokienez, 22an Gabriel Aresti euskaltegiko ikasle eta irakasleek ikasturteko azken jaia egingo dute, udako solstizioa giro tropikalean ospatuta. Bestalde, urteroko ohiturari eutsiz, EHGAM sexu askapen erakundeak Gay harrotasunaren eguna ospatuko du hilaren 28an, ohi bezala afaria, ikuskizuna eta Urrezko Hirukia zein Trapuzko Espartina aipamenen banaketa eginez. Noiz agenda aldizkariak ere bere urteurrena ospatuko du jai baten bidez. Bertan Grises eta Wilhelm & The Dancin' Animals ikusi ahal izango ditugu zuzenean eta, ondoren Dj Mimoloco-k gaua dantzaraziko du.

Zenbat Gara elkartearen hileroko hitzorduei eutsiz, Lagun Artean Kantari kantagintza saio irekia izango dugu hilaren 20an Anje Duhalderen eskutik eta astebete geroago, ekainaren 27an, Urbeltzen Dantza Ganbara ekarriko digu Juan Antonio Urbeltzek, biak ala biak ikasturteko azken saioak izanik.

Kontzertuek ere lekua izango dute gurean ekainean: Mikel Erentxun, Momo (Queen-en gorazarre taldea), Stephen Marley, Ariel Rot, Marlango, Barricada, Anni B Sweet eta Garamendi taldeekin gozatuko dugu. Informazio gehiago eta sarreren salmenta gure webgunean aurkituko dituzu.

Ondarroan ere, pixkat denetarik izango dugu: ekainaren 2an Metalmania eta Alto Voltaje taldeak izango ditugu, hurrenez hurren Metallica eta AC/DC taldeen bertsioak egiten. Hurrengo ostegunean (ekainak 7) Ondarroa berriz ere UEMAko kide dela ospatzeko ekitaldia izango dugu. Kafe Antzokiko II. Poker Gauean modako joko horren gainean zerbait gehiago ikasteko aukera izango dugu eta ekainaren 17an bertsolaritza eta dantza uztartzen dituen Errimak oinetan ikuskizunaz gozatuko dugu. Ekaina bukatzeko, herri osoan sekulako giroa sortarazten duen Zapato Azule jaiak egun osoan girotuko du herria ekainaren 30ean, Radixu Irratiaren eskutik.