Kafe Antzokia

Gaur aurkeztu da jendaurrean Atoan! argitaletxe euskalduna Bilboko Kafe Antzokian. "Euskara errazean" bilduma eta bertan lau liburu aurkeztu ditu Zenbat Gara elkartearen ekimenez sortutako argitaletxe berriak: Ehuneko ehun, Hego Itsasoetako ipuinak, Lurtarrak eta Maggie, kaleko neska bat, denak euskara ulerterrazean idatziak, euskara ikasten ari direnek aparteko zailtasunik gabe irakurri eta ulertu ahal izateko. Imanol Berriatuak bere garaian abiatutako bidean, "Euskara errazean" bildumak erraztu nahi dio irakurleari euskaraz irakurtzen hastea, zenbait elementu erabiliz:

• Irudi eta argazki ugari, testua arindu eta errazago ulertzeko
• Literatura egokitua, euskaraz gustura irakurtzen hasteko
• Testu osagarria, gai nagusia girotu eta kokatzeko
• Ahozko lanketa, gaiaz pentsatu eta hitz egiteko
• Hiztegi lagungarria, kontakizuna oztoporik gabe irakurtzeko
• Liburu bakoitzak zailtasun maila ezberdina du (Europako erreferentzia markoaren arabera)

Etorkizunean, bilduma honetan goiburu berriak argitaratzeaz gain, eduki interesgarria, kritikoa edo eraikitzailea izango duten bestelako liburuak ere ateratzeko asmoa du Atoan! argitaletxeak, jakintza, literatura edo gogoeta arloetakoak. Informazio gehiago eta eskabideak egiteko modua aurkituko duzue egunotan Atoanen webgunean eta, noski, Durangoko Azokan, urtero bezala Zenbat Gara elkarteak ipiniko duen erakustokian ere bai.

Kontzertuak, prentsaurrekoak, kultur ekimenak, kantagintza, dantza ganbara, bertso ekitaldiak, bazkari-afariak, elkartasunezko jaiak… Eta horiez guztiez gain, Kafe Antzokiak orain tailerrak antolatu ditu bilbotar guztiontzat.

Tailerra, gure hizkuntzaren senetik ulertuta, elkarrekin zerbait egiten den jarduna da. Formakuntza zein ludikotasuna lantzeko bitarteko eta tresna; tailerra giza taldeak osatzen du gidari baten laguntzaz, eta bakoitzak dauzkagun gustuak lantzeko esparrua irekitzen digu.

Gure Bilbo honetan milaka asko gara euskararen komunitatea osatzen dugunok eta gure aisialdia, lagun artekoa, prestakuntza, garapena, bizimodua azken finean, euskaraz egiten dugunok. Egoera horri erantzutera dator Kafe Antzokiak antolatutako tailerren ekimena.

Kafe Antzokiak astean zehar mota guztietako tailerrak burutzeko gunea sortu du. Azaroaren 3an hasiko dira eta hiru hilabeteko iraupena izango dute eta, bukatu ostean, beste batzuk egin ahal izango dira. Informazio gehiago eta izen-ematea Zenbat Gara elkartearen bulegoan (4. solairua) edo 94 423 75 91 telefonoan.