• SOUTHERN CULTURE ON THE SKIDS
• BOOGIE PUNKERS
  
  A: 15 euro. (Power Records eta Kafe Antzokia) T: 17 euro.
  
  Southern Culture On The Skids (SCOTS laburbilduta) amerikar hegoaldeko taldea dugu. Ipar Karolinako erdialdean oinarrituak, itxura bitxia dute, filmetako amerikar familia baserritarrarena edo. Country eta tex-mex joerak nabarmentzen dira euren hegoaldeko musikan, R&B eta surf musikarenak bezala. Zazpigarren diskoa besapean datozkigu, letretan elkarri adar joka. Zuzeneko alaia eta ikusgarria. Aurretik Boogie Punkers, Bilboko rock talde bitxia, doinu instrumentalak, rockabilly-a eta psychobiilly-rako joerak.

• SUPER APE
  
  Doako sarrera.
  
  Roots reggae taldea dugu hau, Santanderretik etorria. “Reel I: Ten months and a day” izeneko diskoa kaleratu berri dute, doinu garbi eta jatorrez betea. Gurean arrakasta handia izandako Loud & Lone taldearen itzala nabaritzen da euren musikan. Izan ere, Roberto Sanchez kantariaren ahots berezia Super Apen ere entzun dezakegu..

• GAZTEMUNDU 2002
  Euskal diasporaren jaia
  
  Dantza-piko Batbiru taldearekin
  Doako sarrera.
  
  Gaztemundu programak euskal etxeetako gazteak egungo euskal errealitatera hurbiltzea du helburu. Hamabost egunez gure artean ibiltzen dira diasporako gazteak, bertatik bertara kultura, ekonomia eta gizartearen hainbat arlotako informazioa jasotzen. Aurtengoan monografikoa antolatu dute euskal etxeetako dantza taldeetako arduradunentzat, taldeon arteko elkarlana suspertzeko. Gaur dantza piko saioa ospatuko dute, Batbiru taldearekin, denentzat irekia den ekitaldian.

• MARTIRES DEL COMPAS
  
  A: 12 euro. (Power Records eta Kafe Antzokia). T: 15 euro.
  
  Sevillatik datorkigu flamencoa beste musika batzurekin nahastu duen talde hau. Armonia eta eskala magikoak, konpas freskoak. Heterodoxia hau moden gainetik garatu dute, flamencoaren paloak rockaren gako eskenikoekin aurkezten dizkigute. Nahasketa horren erakusgarri, heavy, salsa, pop-a eta Senegalgo musikatik etorritako musikarien eragina nabaria da lau disko argitaratuta dituen talde honetan.

20 OSTIRALA 22.00

• CLIAR
• BRIAN GEAR
• VIOLET TULLOCH
  Eskoziar gau gogoangarria - The Scottish Night to remember
  
  Sarrera: 6 euro. Zenbat Gararen LAGUNAK: 3 euro.
  
  BBC Radio Scotland-ekin elkarlanean aurkezten dugu eskoziar gau hau, etortzeko diren beste hainbat ekitaldiren aurrerapen legez. Batetik CLIAR, egungo eskoziar taldeetan onenetakoa. Ahozko tradizioa gordetzen du gaelikoz kantatuz. Bestetik, Shetland irletako musikari bikain bi: Brian Gear bibolin jolea bakarlari aparta dugu, belaunaldi gaztearen erakusgarri. Berarekin Violet Tulloch piano jolea, Willie Hunter eta Aly Bain-ekin ibilitakoa.

• EUSKALTEGIKO JAIA
  
  Euskara ikasten ari direnen jaia.

• HEGALKA
  
  Sarrera: 6 euro, Zenbat Gararen LAGUNAK: 3 euro.
  
  Euskal Kultur Erakundearen (EKE) eskutik dator HEGALKA taldea, Bilbon egunotan erakusten ari den KANTUKETAN programaren baitan. Mario Gachisen zuzendaritzapean, bost kantari eta lau musikari bildu dira “Hain hurbil, hain urrun” gaiaren inguruan 16 kantu moldatzeko. Eskenografia Le Petit Théâtre de Pain antzerki konpainiak asmatua da.